Kuri uyu wa Gatandatu tariki ya 13/06/2026 mu Bitaro by'Akarere bya Nemba habereye igikorwa cyo kwibuka ku nshuro ya 32 abari abakozi b'Ibitaro bya Nemba n'Ibigo Nderabuzima bikorana nabyo, Abikorera bo muri aka Karere bazize Jenoside yakorewe Abatutsi mu 1994.

Abitabiriye iki gikorwa harimo Abayobozi mu nzego zitandukanye, Ubuyobozi bw'Akarere ka Gakenke, Umuyobozi wa Caritas muri Diyosezi Gatolika ya Ruhengeri NGIRIMANA Narcisse akaba yarahagarariye Nyiricyubahiro Musenyeri, Padiri Mukuru wa Paruwasi ya Nemba BIGIRINSHUTI Theoneste, Padiri Omonier muri Paruwasi ya  Nemba AHISHAKIYE Diogène, Inzego z'Umutekano, IBUKA, Abikorera bo muri aka Karere, Umunyamabanga Nshingwabikorwa w'Umurenge wa Nemba, abakozi b'Ibitaro, abarwaza bari mu Bitaro bya Nemba, abahagarariye imiryango yabo twibuka, hagamijwe gusubiza agaciro abishwe bazira uko bavutse.

Umuyobozi Mukuru w'Ibitaro by'Akarere bya Nemba Dr MBONYINTWARI Donatien, mu ijambo rye yagarutse ku buzima bw'abari abakozi b'Ibitaro bazize Jenoside yakorewe Abatutsi mu 1994, avuga ko ingengabitekerezo ya Jenoside igomba kurwanywa aho ariho hose.

Umuyobozi w'Akarere ka Gakenke Madamu MUKANDAYISENGA Vestine mu Ijambo rye, yavuze ko kwibuka abazize Jenoside yakorewe Abatutsi mu 1994 ari ugusubiza ubuzima abishwe, ndetse avuga ko twese nk'Abanyarwanda tugomba kurwanya ingengabitekerezo ya Jenoside aho ariho hose.

Uhagarariye abikorera mu Ntara y'Amajyaruguru, Bwana GASIRABO Athanase yagarutse ku ngaruka za Jenoside yakorewe Abatutsi mu 1994, anenga bamwe mu bikoreraga bagize uruhare muri Jenoside batanga ibikoresho byifashishijwe mu kwica Abatutsi. Yasabye abikore ndetse n'Abanyarwanda muri rusange kwirinda icyo ari cyo cyose cyazana amacakubiri mu Banyarwanda.

Mu rwego rwo gukomeza Kwibuka twiyubaka no gufata mu mugongo abarokotse Jenoside yakorewe Abatutsi mu 1994, Abikorera bo mu Karere ka Gakenke batanze inka 2, ibitaro nabyo bitanga inka 1 ikaba yahawe umwe mu muryango wumwe mubari abakozi b'Ibitaro bazize Jenoside yakorewe Abatutsi.

Twibuke Twiyubaka